لټون

د ټرمپ او پوتین لنډه لیدنه پای ته ورسېده؛ د اوکراین جګړه د خبرو اصلي موضوع وه

28 لړم 1405 - 12:18 41 views
د ټرمپ او پوتین لنډه لیدنه پای ته ورسېده؛ د اوکراین جګړه د خبرو اصلي موضوع وه
ټرمپ او پوتین د اپېک غونډې په څنډه کې په شېنژن کې شاوخوا ۴۰ دقیقې خبرې وکړې؛ د کرملین په وینا، د اوکراین جګړه د خبرو اصلي موضوع وه.
د امریکا ولسمشر ډونالډ ټرمپ او د روسیې ولسمشر ولادیمیر پوتین د اسیا او ارام سمندر د اقتصادي همکاریو سازمان (اپېک) غونډې په څنډه کې د چین په شېنژن ښار کې لیدلي دي. دغه کتنه شاوخوا ۳۵ تر ۴۰ دقیقو پورې روانه وه او دواړو مشرانو له پای ته رسېدو وروسته رسنیو ته ګډه اعلامیه وړاندې نه کړه.

ټرمپ د لیدنې په پیل کې پوتین خپل «ملګری» وباله او ویې ویل، دواړه له ډېرو کلونو راهیسې یو بل پېژني او د دې کتنې له لارې د ښو پایلو تمه لري. پوتین د خبرو له پیل مخکې رسنیو ته څرګندونې ونه کړې.

د کرملین د بهرني سیاست سلاکار یوري اوشاکوف ویلي، د دواړو مشرانو ترمنځ د خبرو اصلي موضوع د اوکراین جګړه وه. د هغه په وینا، د روسیې او امریکا پر دوه‌اړخیزو اړیکو او د چین له ولسمشر شي جین‌پینګ سره پر راتلونکې ګډه لیدنه هم خبرې شوې دي.

اوشاکوف د پوتین د مزاج په اړه ویلي، چې نوموړي د لیدنې ځای په «ډېر ښه مزاج» پرېښود او خبرې اترې په ښه توګه ترسره شوې دي.

دا کتنه د ټرمپ، پوتین او د چین د ولسمشر شي جین‌پینګ ترمنځ د درې‌اړخیزې لیدنې له پلان شوې غونډې مخکې ترسره شوې ده. خو د دواړو مشرانو ترمنځ په دې لنډو خبرو کې د کومې هوکړې یا مشخصې پرېکړې اعلان نه دی شوی.
Advertisement Space Available Contact us for advertising