لټون

حوثیانو د سعودي ارامکو ودانۍ ویشتلې؛ سعودي وایي توغندي یې شنډ کړي

17 لړم 1405 - 18:29 14 views
حوثیانو د سعودي ارامکو ودانۍ ویشتلې؛ سعودي وایي توغندي یې شنډ کړي
د سعودي عربستان په ریاض کې د آرامکو اداري ودانۍ د توغندیو د بریدونو پر مهال زیانمنه شوې. سعودي چارواکي وايي، هوايي دفاع یې څو توغندي شنډ کړي دي.

د سعودي عربستان په پلازمېنه ریاض کې د دغه هېواد د تېلو دولتي شرکت «آرامکو» یوې اداري ودانۍ ته د تازه بریدونو پر مهال زیان اوښتی دی. د سعودي عربستان د انرژۍ وزارت وايي، د توغندي د پاتې شونو د لوېدو له امله ودانۍ ته لږ زیان رسېدلی، خو په پېښه کې چا ته مرګ ژوبله نه ده اوښتې.

د وزارت یوه چارواکي ویلي، د توغندي تر لګېدو وروسته د هغې ټوټې د آرامکو پر ودانۍ لوېدلې او ځینې برخې یې زیانمنې کړې دي. د نوموړي په وینا، امنیتي او اړوندو ادارو سمدستي د پېښې ځای ته رسېدلي او لازم اقدامات یې ترسره کړي دي.

خو د فرانسې خبري آژانس (AFP) ته څو عیني شاهدانو ویلي چې د ریاض د ملک عبدالله په مالي سیمه کې د آرامکو برج په نښه شوی دی. د رویټرز یوه خبریال هم د ودانۍ په څو پوړونو کې د ماتو کړکیو او زیانمنې مخ‌برخې لیدلو خبر ورکړی دی.

دا پېښه وروسته له هغې رامنځته شوې چې د سعودي په مشرۍ ائتلاف اعلان وکړ، هوايي دفاعي سیسټمونو یې د ریاض پر لور توغول شوي دوه بالستیک توغندي شنډ کړي دي. ائتلاف همداراز د کروز توغندیو د شنډولو خبر هم ورکړی دی.

د ائتلاف ویاند ترکی المالکي ویلي، د سعودي هوايي دفاعي ځواکونو د حوثیانو له لوري توغول شوي توغندي او بې‌پیلوټه الوتکې هم په نښه او له منځه وړي دي. سعودي چارواکي د دغو بریدونو مسوولیت حوثيانو ته منسوبوي، خو د یکشنبې د پېښې په اړه د حوثیانو له لوري سمدستي څرګندونې نه وې خپرې شوې.

د آرامکو پر ودانۍ برید په داسې حال کې کېږي چې د یمن په جګړه کې د ۲۰۲۲ کال اوربند د روان کال په جولای کې له ماتېدو وروسته د سعودي عربستان او حوثیانو ترمنځ نښتې بېرته زیاتې شوې دي. د راپورونو له مخې، حوثیانو په وروستیو میاشتو کې د سعودي هوايي ډګرونه، د انرژۍ تاسیسات او پوځي مرکزونه په نښه کړي دي.

د ملګرو ملتونو د شمېرو له مخې، د جګړو له بیا پیل راهیسې په یمن کې تر ۱۶۰۰ ډېر کسان وژل شوي او له ۳۰۰ زرو ډېر نور بې‌ځایه شوي دي. د ریاض په مهمه مالي سیمه کې د آرامکو ودانۍ ته زیان د سعودي عربستان او حوثیانو ترمنځ د روان کړکېچ د لا پراخېدو اندېښنې زیاتې کړې دي.


Advertisement Space Available Contact us for advertising