لټون

اوچا: پر ښځینه کارکوونکو بندیزونه د مرستو مخه نیسي

4 لړم 1405 - 08:09 67 views
اوچا: پر ښځینه کارکوونکو بندیزونه د مرستو مخه نیسي
اوچا وايي، د ۲۰۲۶ کال په سپټمبر کې په افغانستان کې د بشري مرستو د لاسرسي ۳۰ خنډونه ثبت شوي، چې ښځینه کارکوونکو محدودیتونه او اداري لاسوهنې پکې شاملې دي.

د ملګرو ملتونو د بشري مرستو د همغږۍ دفتر (اوچا) وايي، په افغانستان کې د ښځینه کارکوونکو پر فعالیتونو محدودیتونه، د مرستندویه ادارو په چارو کې لاسوهنې او امنیتي ستونزې اړمنو خلکو ته د بشري مرستو رسولو بهیر له خنډونو سره مخ کړی دی.

اوچا د یکشنبې په ورځ، د لړم پر ۳مه، په خپل میاشتني راپور کې ویلي چې د بشري مرستو شریکانو د ۲۰۲۶ کال په سپټمبر میاشت کې د مرستو د لاسرسي پر وړاندې د خنډونو ۳۰ پېښې ثبت کړې دي.

د دغه دفتر په وینا، د ثبت شویو پېښو شمېر د اګست میاشتې په پرتله ۲۷ سلنه کم شوی؛ خو اوچا ټینګار کړی چې د پېښو کمېدل په خپله د وضعیت د ښه کېدو معنا نه لري، ځکه ښايي ځینې پېښې نه وي راپور شوې.

د مرستو په چارو کې لاسوهنې او محدودیتونه

د اوچا د راپور له مخې، له ثبت شویو ۳۰ پېښو څخه ۱۸ یې د بشري مرستو په فعالیتونو کې له لاسوهنو سره تړاو لري، په داسې حال کې چې څلور نورې پېښې د چاپېریالي او فزیکي شرایطو له امله رامنځته شوې دي.

اوچا وايي، اداري او پروګرامي لاسوهنې، د ښځینه بشري مرستندویو کارکوونکو پر فعالیتونو محدودیتونه او د مرستو پر ترلاسه کوونکو بندیزونه د مرستندویه ادارو پر کارونو منفي اغېز کوي.

د ښځینه کارکوونکو پر فعالیتونو محدودیتونه په ځانګړي ډول د هغو ښځو او کورنیو لپاره د مرستو رسولو بهیر ستونزمنولای شي چې د ټولنیزو او کلتوري محدودیتونو له امله له ښځینه کارکوونکو پرته مرستو او خدمتونو ته لاسرسی نه شي موندلای.

امنیتي ستونزې هم د مرستو پر رسولو اغېز کوي

د دغه دفتر په وینا، پوځي عملیات، د جګړو دوام، پر بشري مرستندویو کارکوونکو تاوتریخوالی او د مرستندویه ادارو د کارکوونکو نیول هم د بشري فعالیتونو پر وړاندې خنډونه جوړوي.

اوچا زیاته کړې چې د افغانستان څلور ولسوالۍ د بشري مرستو د لاسرسي له سختو محدودیتونو سره مخ دي، چې له امله یې اړمنو خلکو ته د مرستو رسولو چارې له ستونزو سره مخ کېدای شي.

د اړمنو خلکو پر وضعیت اندېښنې

په افغانستان کې میلیونونه خلک د خوراکي توکو، روغتیايي خدمتونو، سرپناه او نورو لومړنیو اړتیاوو لپاره بشري مرستو ته اړتیا لري. په داسې وضعیت کې د مرستندویه ادارو پر فعالیتونو محدودیتونه او د مرستو د رسولو پر وړاندې خنډونه د زیان‌منونکو کورنیو د مرستې ترلاسه کولو وړتیا کمولای شي.

اوچا ټینګار کوي چې د بشري مرستو د اغېزمنې رسونې لپاره باید مرستندویه ادارې وکولای شي خپلې چارې په خوندي او خپلواک ډول ترسره کړي او اړمنو خلکو ته له تبعیض پرته لاسرسی ولري.


Advertisement Space Available Contact us for advertising