محکمې نوموړی د بې احتیاطه موټرچلونې له امله، چې د مسافر د مړینې سبب شوی، مجرم بللی؛ خو د قصدي قتل تور یې رد کړی دی.
د بریتانیا د «ډېلي مېل» ورځپاڼې د راپور له مخې، ۵۳ کلن حیاتالله ترکمني د انګلستان په بازیلډن ښار کې د اوبر موټر چلوونکی و. پېښه له مایکل اشټن، چې ۲۸ کلن و، سره تر لفظي شخړې وروسته رامنځته شوې ده.
د راپور له مخې، اشټن د سفر پر مهال ناروغ شوی او د موټر پر شاتنۍ څوکۍ یې کانګې کړې وې. کله چې موټر خپل منزل ته ورسېد، هغه هڅه وکړه چې څوکۍ پاکه کړي، خو د دواړو ترمنځ شخړه دوام وموند.
د راپور پر بنسټ، کله چې موټر حرکت پیل کړ، اشټن له موټر سره ولګېد او سخت ټپي شو. نوموړی د لندن شاهي روغتون ته ولېږدول شو، خو د مغزي سختو ټپونو له امله د ۲۰۲۵ کال د اکتوبر په څلورمه مړ شو.
قاضي د قضیې د ارزونې پر مهال ویلي، چې چلوونکي باید د موټر د حرکت پر مهال د مسافر شتون ته پام کړی وای او د ټکر مخه یې نیولې وای.
څارنوالانو باور درلود چې ترکمني د غوسې له امله له مسافر سره ټکر کړی و؛ خو نوموړي ویلي چې د هغه د ټپي کولو نیت یې نه درلود او د موټر د حرکت پر مهال یې مسافر نه و لیدلی.
په پای کې، منصفه پلاوي ترکمني د قصدي قتل له تور څخه برائت ورکړ، خو د خطرناکې موټرچلونې په تور یې مجرم وپېژاند چې د مسافر د مړینې لامل شوې وه.