د راپور له مخې، ایټالیا د جولای په ۳۱مه له هسپانیې سره د شېنګن سیمې د پرانیستو سرحدونو ترتیبات وځنډول. د ایټالیا ښياړخي حکومت هغه مهال وویل، غواړي ډاډ ترلاسه کړي چې د هسپانیې په شمالي افریقا کې د سیوتا سیمې ته ورغلي کډوال د ایټالیا خاورې ته د تګ اجازه ونه مومي.
هسپانیې هم په غبرګون کې له ایټالیا سره ورته اقدام وکړ او د روم پرېکړه یې د اروپايي ټولنې د ګټو خلاف او د هسپانیې له وګړو سره تبعیضي چلند وباله.
د ایټالیا د کورنیو چارو وزارت په وینا، د دواړو هېوادونو د کورنیو چارو وزیرانو په ټیلیفوني خبرو کې هوکړه کړې چې د شېنګن د پرانیستو سرحدونو د ترتیباتو ځنډول به نور نه غځوي.
وزارت زیاته کړې، د ګډ شېنګن قلمرو د امنیت د ډاډمنولو لپاره به د معلوماتو شریکول هم پیاوړي شي.