المسند دغه څرګندونې د دوشنبې په ورځ، د اکتوبر په ۱۹مه، په دوحه کې د ۲۰۲۶ کال د نړۍوال امنیت فورم په چوکاټ کې د «بشري ډیپلوماسۍ او د اوبو امنیت ترمنځ د اړیکو پیاوړتیا» تر سرلیک لاندې په یوه غونډه کې کړې دي.
نوموړې ویلي، سیمه له جدي امنیتي ګواښونو سره مخ ده او د دغو ګواښونو اغېزې ښايي د سیمې له پولو واوړي او پر نړۍوال اقتصاد هم اغېز وکړي. هغې زیاته کړې، چې د روان کال په اوږدو کې د اوبو د امنیت په برخه کې ننګونې زیاتې شوې او پر مهمو اوبو رسوونکو تاسیساتو د بریدونو راپورونو دغه وضعیت لا جدي کړی دی.
د قطر د دولت وزیرې ټینګار کړی، چې د اوبو د تصفیې، پاکولو او وېش د تاسیساتو زیانمنېدل د خلکو پاکو اوبو او روغتیايي خدمتونو ته لاسرسی محدودولای شي. د هغې په وینا، د ملکي وګړو د حیاتي زېربناوو ساتنه، د نړۍوالو بشري قوانینو رعایت او د هېوادونو ترمنځ همکاري د دغو ستونزو د مخنیوي لپاره اړین دي.
المسند د قطر د مرستندویو هڅو په اړه ویلي، چې دغه هېواد د بشري مرستو، منځګړیتوب، د بیارغونې د تمویل او بېځایه شویو ملکي وګړو د ملاتړ له لارې په بېلابېلو کړکېچنو سیمو کې ونډه اخیستې ده. هغې په ځانګړې توګه د افغانستان ترڅنګ غزه، سوډان، لبنان، سومالیا او سوریه یاد کړي دي.
نوموړې همداراز د وسلهوالو شخړو پر ښکېلو خواوو د اغېز اچولو لپاره د ګډو نړۍوالو هڅو پر اړتیا ټینګار کړی او له ټولو اړخونو یې غوښتي، چې د جګړو له امله د اغېزمنو خلکو د ګټې لپاره حیاتي سرچینې خوندي کړي.
د قطر د بهرنیو چارو وزارت تر دې وړاندې هم ویلي، چې دوحه غواړي د ملګرو ملتونو او بشري بنسټونو په همکارۍ په افغانستان کې د بشري مرستو او پراختیايي فعالیتونو ملاتړ وکړي. د دغه هېواد چارواکو د روغتیا، زدهکړو او اقتصادي پیاوړتیا برخې د همکارۍ له مهمو موضوعاتو بللې دي.