بقايي له خبریالانو سره په خبرو کې ویلي چې ایران کولای شي د دواړو لوریو ترمنځ په منځګړیتوب او د شخړې په هواري کې مرسته وکړي.
نوموړي په یمن کې د حوثیانو په بریدونو کې د ایران ښکېلتیا هم رد کړې او ویلي یې دي چې حوثیان د خپلو ګټو پر بنسټ پرېکړې کوي.
تر دې وړاندې د سعودي عربستان ځینو چارواکو پر ایران تور پورې کړی و چې له حوثیانو سره د بریدونو په ترسره کولو کې مرسته کوي او په دې شخړه کې ښکېل دی.
دا څرګندونې په داسې حال کې کېږي چې د راپور له مخې، په وروستیو ورځو کې د سعودي عربستان او حوثیانو ترمنځ نښتې زیاتې شوې او دواړو لوریو پر یو بل مرګوني بریدونه کړي دي.
بلخوا، یو شمېر هېوادونو د سعودي عربستان ملاتړ کړی او له حوثیانو یې غوښتي چې پر دغه هېواد بریدونه ودروي. دغو هېوادونو خبرداری ورکړی چې دا ډول بریدونه د سیمې امنیت او ثبات له ګواښ سره مخ کوي.