د سویډني ورځپاڼې «ETC» د راپور له مخې، د کډوالۍ اداره استدلال کوي چې نویان له امریکا سره پیاوړې اړیکې لري او لا هم په دغه هېواد کې د دایمي استوګنې معتبره اجازه لري.
خو عباس نویان دا ادعا رد کړې ده. د نوموړي د اعتراض له ثبتېدو وروسته، قضیه د کډوالۍ محکمې ته سپارل شوې او تر اوسه یې وروستۍ پرېکړه نه ده اعلان شوې.
عباس نویان په ۲۰۱۹ کال کې په سویډن کې د افغانستان د سفیر په توګه ټاکل شوی و او تر ۲۰۲۴ کال پورې یې په دغه هېواد کې دنده ترسره کړې ده. د سویډن د راډیو د یوه پخواني راپور له مخې، د هغه د استوګنې د اجازې د نه تمدید موضوع هم تر دې وړاندې مطرح شوې وه.
تر هغه چې محکمه وروستۍ پرېکړه نه وي کړې، له سویډن څخه د نوموړي د اخراج موضوع لا هم د قضایي بهیر برخه ده.