د جرمني «وېلت ام زونتاګ» ورځپاڼې د راپور له مخې، راما ویلي چې البانیا نه غواړي د هغو پناهغوښتونکو لپاره د «بېرته ستنولو مرکزونو» کوربه شي چې د پناه غوښتنې غوښتنلیکونه یې رد شوي وي.
هغه ټینګار کړی چې له ایټالیا سره د مهاجرو په تړاو د دوو مرکزونو د جوړولو پخوانۍ هوکړه د دواړو هېوادونو ترمنځ ځانګړې هوکړه وه او باید د نورو اروپايي هېوادونو لپاره د بېلګې په توګه ونه کارول شي.
راما ویلي، په درېیمو هېوادونو کې د کډوالو د مرکزونو جوړول په یوازې ځان د کډوالۍ ستونزې نشي حلولای.
د البانیا چارواکو هم څو ځله ټینګار کړی چې د دغه هېواد د مهاجرتي همکاریو هوکړه یوازې له ایټالیا سره ده او د اروپايي ټولنې نور هېوادونه پکې شامل نه دي.
د اروپايي ټولنې د بېرته ستنولو طرحه
د راما څرګندونې وروسته له هغې مطرح شوې چې د اروپايي ټولنې د کورنیو چارو وزیرانو د مهاجرو د بېرته ستنولو د نویو مقرراتو چوکاټ تصویب کړ. دغه مقررات له اروپايي ټولنې څخه بهر په هېوادونو کې د کډوالو د بېرته ستنولو د مرکزونو د جوړېدو زمینه برابروي.
د دې طرحې موخه د هغو رد شویو پناهغوښتونکو او ځینو نورو کډوالو انتقال دی چې خپل اصلي هېوادونو ته یې بېرته ستنول ممکن نه وي.
د اروپايي ټولنې ډېری غړي هېوادونه د دې تګلارې ملاتړ کوي، خو هسپانیا ورسره مخالفت کړی دی.
جرمني، اتریش، یونان، ډنمارک او هالنډ د دې طرحې له ملاتړ کوونکو هېوادونو څخه دي.
کوم هېوادونه د مرکزونو احتمالي کوربه کېدای شي؟
د دغو مرکزونو د کوربهتوب په اړه د روانډا او یوګانډا نومونه هم مطرح شوي دي.
ځینې چارواکي روانډا مناسب انتخاب بولي، ځکه د بریتانیا او روانډا ترمنځ د پخوانۍ مهاجرتي هوکړې پاتې زیربناوې ښايي په راتلونکو طرحو کې وکارول شي.
په همدې حال کې، البانیا لا هم اروپايي ټولنې ته غړیتوب خپل له مهمو ستراتیژیکو هدفونو څخه بولي. شنونکي باور لري چې دغه موضوع هم ښايي د کډوالو د بېرته ستنولو د مرکزونو د کوربهتوب په اړه د البانیا په دریځ کې رول ولري.