ایراني رسنیو د سپټمبر پر ۶مه راپور ورکړی چې د دغه هېواد د اقتصاد وزارت د روانو پوځي کړکېچونو له امله د رامنځته شویو اقتصادي ستونزو د مدیریت لپاره د «اقتصادي جګړې» ځانګړې کاري ډله جوړه کړې ده. د ایران د اقتصاد وزارت مرستیال مرتضی زمانیان تسنیم خبري اژانس ته ویلي، دغه کاري ډله به د سوداګرۍ، کاروبارونو، مالي تمویل او نورو اقتصادي برخو ستونزې په چټکۍ وپېژني او د حل لپاره به یې عملي اقدامات وکړي.
ایران له کلونو راهیسې د امریکا له بندیزونو سره مخ دی او اوس د روانو جګړو له امله له لا زیاتو اقتصادي فشارونو سره مخ شوی دی. د دې نوې کاري ډلې موخه د دولتي ادارو ترمنځ د همغږۍ رامنځته کول او د هغو اقتصادي ستونزو د ځنډ مخنیوی دی چې د څو ادارو ګډې همکارۍ ته اړتیا لري.
په همدې حال کې، ایراني چارواکو خبرداری ورکړی چې پر ایران نور بریدونه ښايي د لا سخت غبرګون لامل شي. ایراني چارواکو همدارنګه ویلي چې اقتصادي ثبات، تولید، کارموندنه او د خلکو معیشت د روانو جګړو او بندیزونو له امله له مهمو ننګونو سره مخ دي.
د ایران او چین د سوداګرۍ خونې مشر مجیدرضا حریري هم ویلي چې د جګړې له پیل وړاندې د ایران تر ټولو لویه ستونزه اقتصادي وضعیت و. د هغه په وینا، جګړې، پوځي بریدونو او اقتصادي فشارونو دغه ستونزې لا پسې زیاتې کړې دي.