د یمن حوثي ډلې ادعا کړې چې د یکشنبې په ورځ یې د سعودي عربستان پلازمېنه ریاض کې د ملک خالد نړیوال هوايي ډګر او یوه مالي مرکز د دوو بالستیک توغندیو په وسیله په نښه کړي دي.
د حوثیانو پوځي ویاند یحیی سریع ویلي، دغه بریدونه بریالي وو او خپلو ټاکلو موخو ته رسېدلي دي؛ خو د دې ادعا په اړه تر اوسه خپلواکه تایید نه دی خپور شوی.
د رویټرز د راپور له مخې، د حوثیانو دا ادعا د سعودي په پلازمېنه کې د تازه چاودنو له راپورونو سره هممهاله خپره شوې ده. خو دا نه ده روښانه چې ایا توغندي خپلو ټاکلو موخو ته رسېدلي او که د هوايي دفاعي سیستمونو له خوا شنډ شوي دي. د بریدونو له امله د احتمالي زیانونو او مرګژوبلې په اړه هم کره معلومات نشته.
بلخوا، د سعودي په مشرۍ ائتلاف ویلي چې د یکشنبې په سهار یې د ریاض پر لور دوه بالستیک توغندي شنډ کړي او د هېواد په ختیځه سیمه کې یې درې بېپیلوټه الوتکې هم راغورځولې دي. د ائتلاف ویاند ویلي چې د هوايي دفاعي سیستمونو له فعالېدو وروسته د خطر خبرداری پای ته رسېدلی و. تر اوسه نه ده روښانه چې د ائتلاف له خوا شنډ شوي توغندي هماغه توغندي دي چې حوثیان یې د هوايي ډګر او مالي مرکز پر لور د توغولو ادعا کوي.
دا په داسې حال کې ده چې د رویټرز د راپور له مخې، د تېرې اوونۍ په یوه برید کې د ریاض په مالي سیمه کې د سعودي ارامکو د دولتي تېلو شرکت یوه اداري ودانۍ هم زیانمنه شوې وه. په وروستیو اوونیو کې د سعودي پر هوايي ډګرونو، بندرونو او د انرژۍ پر تاسیساتو د بریدونو راپورونه زیات شوي او سعودي ځواکونو هم په یمن کې د حوثیانو پر اهدافو هوايي بریدونه کړي دي.
په سیمهییزه کچه، قطر د نومبر پر اتمه د سعودي پر بېلابېلو سیمو د حوثیانو بریدونه وغندل او د ریاض پر لور د توغندیو توغول یې د سعودي د حاکمیت نقض او د ملکي وګړو ژوند ته ګواښ وباله. دوحې له سعودي عربستان سره خپل ملاتړ او پیوستون هم څرګند کړی دی.
د سعودي عربستان او حوثیانو ترمنځ د نښتو زیاتوالی په داسې وخت کې دی چې په یمن کې هم جګړه شدیده شوې او د ۲۰۲۲ کال اوربند نور اغېزمن نه ښکاري.