لټون

افغانستان او روسیې د ۱۰۳ میلیونه ډالرو ۱۵ تفاهمنامې لاسلیک کړې

22 لړم 1405 - 11:06 25 views
افغانستان او روسیې د ۱۰۳ میلیونه ډالرو ۱۵ تفاهمنامې لاسلیک کړې
افغانستان او روسیې د ۱۰۳ میلیونه ډالرو په ارزښت ۱۵ اقتصادي تفاهمنامې لاسلیک کړې. په دې هوکړو کې د درملو، غنمو او غوړیو واردات او روسیې ته د افغان مېوو صادرات شامل دي.

د افغانستان او روسیې ترمنځ د اقتصادي او سوداګریزو اړیکو د پراختیا په موخه د ۱۰۳ میلیونه ډالرو په ارزښت ۱۵ تفاهمنامې لاسلیک شوې دي. دغه هوکړې د دواړو هېوادونو د خصوصي سکټورونو ترمنځ د روسیې د لوړپوړي پلاوي د سفر پر مهال په کابل کې لاسلیک کړې دي.

د افغانستان د ریاست‌الوزراء د اقتصادي معاونیت د معلوماتو له مخې، دغه تفاهمنامې د روسیې د لومړي وزیر مرستیال الکسي اوورچوک او د افغانستان د ریاست‌الوزراء د اقتصادي مرستیال ملا عبدالغني برادر په حضور کې لاسلیک شوې دي.

د هوکړو له مخې، افغانستان به له روسیې څخه درمل، غنم، اوړه او غوړي واردوي او په بدل کې به تازه مېوې، په ځانګړي ډول انار، روسیې ته صادروي. دغه تفاهمنامې د دواړو هېوادونو ترمنځ د سوداګرۍ د پراختیا او په نورو اقتصادي برخو کې د همکاریو موضوعات هم رانغاړي.

د روسیې د پلاوي سفر او د پانګونې خبرې

د روسیې د لومړي وزیر مرستیال الکسي اوورچوک د نومبر په ۱۲مه د یوه لوړپوړي پلاوي په مشرۍ کابل ته ورسېد. د افغانستان د اقتصادي معاونیت په وینا، په دغه پلاوي کې د روسیې د بېلابېلو وزارتونو او ادارو استازي، سوداګر، پانګه‌وال او صنعتکاران شامل وو او ټولټال یې شمېر ۱۳۰ کسانو ته رسېده.

اوورچوک په کابل کې له ملا عبدالغني برادر او د ریاست‌الوزراء له رئیس‌الوزراء ملا محمدحسن اخوند سره هم ولیدل.

په دغو لیدنو کې د افغانستان د کانونو، نفت او ګاز، انرژۍ، صنعت، کرنې، روغتیا، مخابراتو او ترانسپورټ په برخو کې د روسیې د پانګونې پر فرصتونو خبرې وشوې.

ملا عبدالغني برادر له روسي شرکتونو وغوښتل چې د افغانستان د طبیعي زېرمو په استخراج او د صنعتي او زیربنايي پروژو په پلي کولو کې پانګونه وکړي.

نوموړي همدارنګه له روسیې وغوښتل چې د افغان صادراتو لپاره خپل بازارونه اسانه کړي، د ترانسپورټ او لېږد لګښتونه راکم کړي او افغان سوداګرو ته د اوږدمهاله ویزو په ورکړه کې اسانتیاوې رامنځته کړي.

د دواړو هېوادونو ترمنځ د سوداګرۍ زیاتوالی

د روسیې د لومړي وزیر مرستیال ویلي، د ۲۰۲۶ کال په لومړیو اتو میاشتو کې د افغانستان او روسیې ترمنځ سوداګري له ۳۴۹ میلیونو ډالرو زیاته شوې چې د تېر کال د همدې مودې په پرتله دوه برابره زیاتوالی ښيي.

د راپورونو له مخې، په همدې موده کې روسیې ته د افغانستان د صادراتو ارزښت هم ۱۲.۸ میلیونه ډالرو ته رسېدلی چې د تېر کال په پرتله ۲.۲ سلنه زیاتوالی ښيي.

روسي چارواکو ویلي، مسکو غواړي له افغانستان سره سوداګریزې اړیکې پراخې کړي او د افغان محصولاتو د صادراتو په برخه کې همکاري وکړي.

د سیاسي اړیکو پراختیا

د افغانستان او روسیې ترمنځ اقتصادي اړیکې په داسې حال کې پراخېږي چې مسکو د ۲۰۲۵ کال د جولای په لومړۍ نېټه د طالبانو حکومت په رسمیت وپېژاند او په دې توګه لومړنی هېواد شو چې دغه اقدام یې وکړ.

د روسیې او افغانستان ترمنځ په وروستیو میاشتو کې د سوداګرۍ، انرژۍ، ترانسپورټ او پانګونې په برخو کې اړیکې زیاتې شوې دي.

که څه هم د ۱۵ تفاهمنامو د لاسلیک ارزښت ۱۰۳ میلیونه ډالره اعلان شوی، خو د دغو هوکړو د عملي کېدو لپاره کره مهالوېش لا نه دی اعلان شوی.


Advertisement Space Available Contact us for advertising