د روسیې د لومړي وزیر مرستیال الکسي اوورچوک په مشرۍ یو لوړپوړی اقتصادي پلاوی د پنجشنبې په ورځ کابل ته رسېدلی او د طالبانو د چارواکو له خوا یې هرکلی شوی دی. ټاکل شوې د دغه سفر پر مهال د افغانستان او روسیې ترمنځ د سوداګرۍ او اقتصادي همکاریو یو بینالحکومتي سند هم لاسلیک شي.
د طالبانو د ویاند مرستیال حمدالله فطرت ویلي، چې د ریاستالوزرا اقتصادي مرستیال ملا عبدالغني برادر په ارګ کې د روسیې پلاوي ته هرکلی ووایه.
د فطرت په وینا، تمه ده اوورچوک د سفر په ترڅ کې د طالبانو له رییسالوزرا ملا محمدحسن اخوند، اقتصادي مرستیال ملا عبدالغني برادر او یو شمېر نورو طالب چارواکو سره وګوري.
د دغو لیدنو په اجنډا کې د افغانستان او روسیې ترمنځ د سیاسي، اقتصادي، سوداګریزو او ټرانسپورټي اړیکو پراختیا، د پانګونې فرصتونه او د ګډو اقتصادي پروژو عملي کول شامل دي.
د اقتصادي همکاریو د تړون جزئیات
په کابل کې د روسیې د سوداګریز مرکز مشر رستم حبیبالله تر دې وړاندې ویلي وو، چې د اوورچوک د سفر پر مهال به د دواړو لورو ترمنځ د سوداګرۍ او اقتصادي همکاریو یو بینالحکومتي سند لاسلیک شي.
د نوموړي په وینا، دغه سند به د سوداګرۍ، انرژۍ، ټرانسپورټ، روغتیا، کرنې، معلوماتي ټکنالوژۍ، لوژستیک او پانګونې برخې رانغاړي. همداراز، د دواړو هېوادونو ترمنځ د سوداګریزو ویزو د اسانتیاوو موضوع هم پکې شامله ده.
دا سفر په داسې حال کې ترسره کېږي چې د روسیې د ولسمشر ځانګړي استازي ضمیر کابلوف د روان کال د اکتوبر په ۱۶مه ویلي وو، چې د افغانستان او روسیې ترمنځ سوداګري د ۲۰۲۶ کال په لومړۍ نیمایي کې د تېر کال د ورته مودې په پرتله دوه برابره شوې ده؛ خو هغه ویلي وو چې د دواړو هېوادونو د سوداګرۍ عمومي کچه لا هم محدوده ده.
روسیه د ۲۰۲۵ کال په جولای کې لومړنی هېواد شو چې د طالبانو حکومت یې په رسمي توګه په رسمیت وپېژاند. د اوورچوک دا سفر د کابل او مسکو ترمنځ د سیاسي او اقتصادي اړیکو د پراختیا په لړ کې ترسره کېږي.