لټون

په بریتانیا، ایرلنډ او ایټالیا کې سلګونو ښوونځیو ته د بم ګواښونه؛ چارواکي یې دروغجن بولي

21 لړم 1405 - 09:58 58 views
په بریتانیا، ایرلنډ او ایټالیا کې سلګونو ښوونځیو ته د بم ګواښونه؛ چارواکي یې دروغجن بولي
Photo: Reuters په بریتانیا، ایرلنډ او ایټالیا کې سلګونو ښوونځیو د بم ګواښونه ترلاسه کړي؛ چارواکي یې دروغجن بولي او په ایټالیا کې شاوخوا ۳۰۰ ښوونځي تخلیه شوي دي.
د بریتانیا، ایرلنډ او ایټالیا سلګونه ښوونځي د چهارشنبې په ورځ د بم‌اېښودنې له ګواښونو ډک برېښنالیکونه ترلاسه کړي دي. امنیتي چارواکو دغه ګواښونه بې‌باوره او دروغجن بللي، خو په ایټالیا کې د احتیاطي تدابیرو له مخې شاوخوا ۳۰۰ ښوونځي تخلیه شوي دي.

د فرانس ۲۴ د راپور له مخې، په سکاټلنډ، شمالي ایرلنډ او د ایرلنډ جمهوریت کې پولیسو ویلي چې یو عمومي ګواښمن برېښنالیک ګڼو ښوونځیو ته لېږل شوی و او د لومړنیو څېړنو له مخې له بریتانیا بهر سرچینه لري.

په شمالي ایرلنډ کې له ۳۰۰ څخه زیاتو ښوونځیو دغه برېښنالیک ترلاسه کړی، خو پولیسو ویلي چې د ګواښ د باوري کېدو هېڅ نښه نه شته او د خلکو پر وړاندې هم کوم پراخ امنیتي خطر نه دی تشخیص شوی. د ایرلنډ پولیسو هم ویلي چې ګواښ جدي نه دی او ښوونځیو ته د تخلیې اړتیا نشته.

په سکاټلنډ کې هم پولیسو تر ارزونې وروسته دغه پیغامونه دروغجن بللي دي. چارواکو په ورته وخت کې د خلکو او د زده‌کوونکو د کورنیو اندېښنې درک کړې او سپارښتنه یې کړې چې د ورته ګواښونو د ترلاسه کولو په صورت کې دې پولیس خبر کړي.

په ایټالیا کې د ښوونځیو د تخلیې له امله ګڼو والدینو خپل ورځني کارونه پرېښودل او د خپلو ماشومانو د اخیستو لپاره ښوونځیو ته ورغلل.

د روم په یوه ښوونځي کې والدینو ته د پیغام له لارې خبر ورکړل شوی و چې د بم‌اېښودنې له ګواښ وروسته ټول زده‌کوونکي خوندي سیمې ته لېږدول شوي او د ښوونکو تر څارنې لاندې دي.

د یوه زده‌کوونکي مور، نینسي بېګو، ویلي چې لور یې د پېښې پر مهال ژړل، ځکه ماشومان نه پوهېدل چې څه روان دي او له ښوونځي څخه تر راوتلو وروسته هم وېره ورسره پاتې وه.

د راپور له مخې، په ایټالیا کې ترلاسه شوي برېښنالیک د «میخایل اندروپوف» په نوم لاسلیک شوی و؛ هغه کس چې ځان یې د «ویلایت اف میسوګینستان» مشر معرفي کړی و. د همدې نوم لرونکي کس ادعا کړې وه چې د جمعې په ورځ یې هم په ایرلنډ او بلغاریا کې د رسنیو دفترونو ته د بم ګواښونه لېږلي دي.

د ایټالیا د پوهنې وزیر، جوزېپه والدیټارا، ویلي چې دا ګواښونه په لومړنیو ارزونو کې دروغجن ښکاري او ښايي د اغېزمنو ښوونځیو شمېر نور هم زیات شي.

بلخوا، د ایټالیا دفاع وزیر ګویډو کروزیټو ویلي چې دا ډول ګواښونه د خلکو ترمنځ د وېرې او اندېښنې خپرولو یوه هڅه ده؛ خو په وینا یې، دا ډول کړنې تل د بهرنیو هېوادونو یا دښمنو ډلو له خوا نه ترسره کېږي، بلکې ځینې کسان د پام رااړولو لپاره هم دا کارونه کوي.

د روم پولیسو ویلي چې د پېښې په اړه څېړنې روانې دي.
Advertisement Space Available Contact us for advertising