د سعودي عربستان چارواکو د شنبې په ورځ، د اکتوبر پر ۲۴مه، د مکې مکرمې په ګډون د دغه هېواد په څلورو سیمو کې د احتمالي هوايي ګواښ په اړه بیړنۍ خبرتیاوې خپرې کړې، خو څو دقیقې وروسته یې اعلان وکړ چې خطر پای ته رسېدلی دی.
د سعودي عربستان د ملکي دفاع ادارې د ملي بیړني خبرداري سیستم له لارې د مکې مکرمې، جده، طایف او ینبع سیمو اوسېدونکو ته د احتمالي خطر خبر ورکړی و. چارواکو له خلکو غوښتي وو چې د خوندیتوب لارښوونې تعقیب کړي او نږدې خوندي ځای ته ولاړ شي.
د رویټرز خبري اژانس د راپور له مخې، د سعودي ملکي دفاع ادارې شاوخوا لس دقیقې وروسته اعلان وکړ چې په یادو سیمو کې د خطر وضعیت پای ته رسېدلی دی. چارواکو د لومړنیو خبرتیاوو د خپرېدو اصلي لامل په مشخص ډول نه و روښانه کړی.
په ورته وخت کې، د سعودي په مشرۍ د ائتلاف ویاند تورن جنرال ترکی المالکي ویلي چې د سعودي هوايي دفاع د یمن د حوثیانو له لوري د طایف او ینبع ښارونو پر لور توغول شوي دوه بالستیک توغندي کشف او له منځه وړي دي.
د سعودي چارواکو د مکې مکرمې لپاره د خبرداري او د یادو توغندیو د شنډولو ترمنځ مستقیم تړاو نه دی روښانه کړی.
د ملکي دفاع ادارې له خلکو غوښتي چې د خوندیتوب رسمي لارښوونې تعقیب کړي، له راټولېدو او د پېښې د انځورونو له اخیستو ډډه وکړي او په بیړني حالت کې د ایمرجنسي شمېرې سره اړیکه ونیسي.
دا خبرتیاوې په داسې وخت کې خپرېږي چې د سعودي عربستان او د یمن د حوثي غورځنګ ترمنځ تاوتریخوالی یو ځل بیا زیات شوی دی. د رویټرز د راپور له مخې، د سعودي په مشرۍ ائتلاف د ریاض پر لور د توغول شوي یوه بالستیک توغندي د شنډولو خبر هم ورکړی دی.
د سیمې د امنیتي وضعیت د خرابېدو او د توغندیزو او ډرون بریدونو د راپورونو له زیاتېدو سره، د سعودي چارواکو د هېواد په بېلابېلو برخو کې د احتمالي ګواښونو په اړه د خلکو د خبرولو لپاره بیړني سیستمونه فعال کړي دي.