د ایران د حکومت ویاندې فاطمه مهاجراني ویلي، د بهرنیو چارو وزیر عباس عراقچي د امریکا ځواب د قطر له لارې ترلاسه کړی او د چهارشنبې په ورځ یې د کابینې په غونډه کې ولسمشر مسعود پزشکیان ته هم وړاندې کړی دی. د امریکا د ځواب جزئیات تر اوسه نه دي خپاره شوي.
ایران تېره اوونۍ وړاندیز کړی و چې که امریکا د ایران پر بندرونو محاصره لرې کړي او ځینې نور شرایط ومني، تهران به د اوو ورځو په موده کې د هرمز تنګي د بیا پرانیستلو او د سمندري تګ راتګ د عادي کېدو لپاره اقدام وکړي. وروسته به د جګړې د پای ته رسولو او د ایران د اټومي پروګرام په اړه پراخې خبرې پیل شي.
د امریکا ولسمشر ډونالډ ټرمپ مخکې د ایران دغه وړاندیز رد کړی و، خو د ایران د بهرنیو چارو وزیر ویلي وو چې تهران تر هغه وخته د واشنګټن رسمي رد نه و ترلاسه کړی. اوس د قطر په منځګړیتوب د دواړو لورو ترمنځ د پیغامونو لېږد بیا روان دی.
د رویټرز د یوه راپور له مخې، د خبرو په اړه د معلوماتو لرونکي یوه چارواکي ویلي چې د دواړو لورو ترمنځ د احتمالي هوکړې پر اصلي اقداماتو تر ډېره موافقه شته، خو اختلاف دا دی چې دغه اقدامات باید په کوم ترتیب ترسره شي. قطر هڅه کوي د دواړو خواوو ترمنځ دغه اختلاف حل کړي.
هرمز تنګی د نړۍ د انرژۍ د لېږد له مهمو سمندري مسیرونو څخه دی او د جګړې له امله یې د تېلو او ګازو نړیوال انتقال اغېزمن شوی دی. همدا موضوع د تهران او واشنګټن د روانو غیرمستقیمو خبرو له مهمو محورونو څخه ده.
تر اوسه د امریکا د ځواب محتوا او دا چې ایا دواړه لوري به پر یوه نوي موقتي اوربند یا پراخې هوکړې موافق شي، په رسمي ډول نه دي اعلان شوي.